[prenta uppsett í dálka] 83. fundur, 123. lþ.
Magnús Árni Magnússon:
Hæstv. forseti. Ég man að ég fylgdist af áhuga með atkvæðagreiðslu á Alþingi í sjónvarpi í febrúar 1983 þegar greidd voru atkvæði um að mótmæla ekki hvalveiðibanni Alþjóðahvalveiðiráðsins. (Gripið fram í: Varstu fæddur.) Ég var 14 ára. Ég man eftir að ég fagnaði innilega þegar úrslitin lágu fyrir. Ég var í hjarta mínu á móti hvalveiðum.
Nú 16 árum síðar er afstaða mín enn nokkuð áþekk þó að rökin séu önnur. Ég tel að í ljósi þess að ríkisstjórn Íslands ætlar ekki að undirrita Kyoto-bókunina á tilskildum tíma, þá væri Ísland að sverta ímynd sína í umhverfismálum mjög alvarlega með samþykkt þessarar tillögu. Ég segi nei við tillögunni í heild sinni og tek ekki afstöðu til einstakra greina.
