Össur Skarphéðinsson (andsvar):
Herra forseti. Hæstv. ráðherra rakti ferlið eins og hann telur að það liggi fyrir. En hann svaraði samt ekki spurningunni: Hvað gerist ef aðalskipulag einhvers sveitarfélags er samþykkt af sveitarstjórn þess sveitarfélags í andstöðu við það svæðisskipulag sem fyrir liggur? Hvað á þá að gera til þess að skera úr þeim ágreiningi sem er milli aðalskipulags sveitarfélagsins og svæðisskipulagsins? Ég er þá auðvitað að tala um að þetta sé búið að fara í gegnum Skipulagsstofnun sem hefur vísað því aftur til samvinnunefndar. Hún á að gæta samræmis og hún reynir auðvitað að beita fortölum. Hefur hún eitthvert vald umfram fortölur?