Ásta R. Jóhannesdóttir (andsvar):
Herra forseti. Ég þakka hæstv. ráðherra fyrir svörin. Ég hefði gjarnan viljað fá skilgreint betur hvernig --- nú er allur gangur á því hvernig ný lög eru kynnt hjá Tryggingastofnun --- á að kynna þeim öryrkjum, sem e.t.v. ættu rétt á breytingu á sínu mati. Verður þeim sent bréf eða hvernig verður farið í þá kynningu?
Ég spyr hæstv. ráðherra í framhaldi af þessu með 40 milljónirnar, telur hæstv. ráðherra að sú fjárveiting muni duga til að sinna því verkefni þannig að ekki verði biðlistar eftir endurhæfingu eins og er í dag?