Landbúnaðarráðherra (Guðmundur Bjarnason) (andsvar):
Hæstv. forseti. Út af því að hv. þm. kvaðst hafa haft samráð við mig um málið vil ég segja örfá orð. Það er rétt að hann hringdi í mig rétt fyrir þennan fund og tjáði mér að hann væri andvígur málinu. Ég sagði honum að ég legði mikla áherslu á að málið yrði afgreitt eins og ég hafði gert við nefndina sjálfa, talið það brýnt hagsmunamál fyrir skógarbændur í landinu, fyrir bændur alla og fyrir byggðastefnu. Það stendur. Ég vildi bara að þetta kæmi fram.