[prenta uppsett í dálka] 91. fundur, 123. lþ.
Steingrímur J. Sigfússon:
Herra forseti. Ég get ekki stutt þetta mál eins og það ber að. Í fyrsta lagi er ég ósáttur við útfærslu kjördæmamarka eins og sá rammi er lagður í frv. Ég er afar ósáttur við að ekki skuli vera gert ráð fyrir að Norðurlandsfjórðungur fái að halda saman sem eitt kjördæmi og mér kemur skipting eins sveitarfélags, þ.e. Reykjavíkur, í tvö kjördæmi spánskt fyrir sjónir.
Ég er í öðru lagi mjög ósáttur við þann þröskuld sem settur er í frv. hvað varðar úthlutun jöfnunarsæta og ég tel hann ólýðræðislegan.
Í þriðja lagi harma ég, herra forseti, að í tengslum við þessar breytingar á kosningalögum og stjórnarskrá skuli ekki reynt að taka skref í átt til aukins persónukjörs. Ég greiði því ekki atkvæði.
