Sjávarútvegsráðherra (Þorsteinn Pálsson):
Herra forseti. Það má lýsa umræðuefni kvöldsins á einfaldan hátt. Það er gróandi í íslensku þjóðlífi. Það er vöxtur í íslensku atvinnulífi og það eru framfarir í menntamálum og það eru framfarir í heilbrigðismálum. Við höfum verið að umbylta dómskerfinu og við höfum gert breytingar á lögreglunni til að færa hana nær fólkinu og til að auka réttaröryggi í landinu. Það er óumdeilt í umræðunni í kvöld að Ísland er í fremstu röð þjóða þegar brugðið er upp mælikvarða lífskjara í víðustu merkingu þess orðs. En hvernig höfum við náð þeim árangri? Jú, vissulega má rekja hann í ýmsum efnum til langrar baráttu í áratugi og vissulega má benda á bættar ytri aðstæður að undanförnu en mest er þó um vert að á síðustu árum höfum við fylgt nýjum straumum við stjórn efnahagsmála og náð með skjótum hætti undraverðum árangri. Í hverju er sá árangur fólginn? Hann er fólginn í því að hagvöxtur er meiri á Íslandi um þessar mundir en hann hefur verið áður og meiri en í nágrannaríkjunum. Hann er fólginn í því að kaupmáttur heimilanna í landinu hefur aukist hér þrefalt til fjórfalt meira en í nágrannalöndunum. Hann er fólginn í því að hér er meiri atvinna en í nágrannalöndunum. Hann er fólginn í því að við höfum náð jafnvægi í ríkisfjármálum. Hann er fólginn í því að við ætlum að greiða niður skuldir ríkisins um 30 milljarða króna á tveimur árum. Við ætlum með því móti að spara okkur vaxtagreiðslur til útlendinga og skapa þannig svigrúm til þess að bæta raunverulega velferðarkerfið í landinu. Við þessar aðstæður, eru þá ekki allir sammála um þær leiðir sem farnar hafa verið að þessum markmiðum? Er ekki pólitíkin í heiminum að færast saman, að færast inn á miðjuna? Þegar að þessu er spurt bregður svo við á Íslandi að jafnaðarmenn, forustumenn jafnaðarmanna, gefa út sameiginlega yfirlýsingu vegna væntanlegs sameiginlegs framboðs. Á sama tíma og forustumenn jafnaðarmanna í Evrópu lýsa því yfir að þeir eru að færa flokka sína inn á miðjuna lýsa forustumenn jafnaðarmanna á Íslandi yfir því að þeir hafi jafnvel fært Alþb. til vinstri við það sem áður var sem þýðir með öðrum orðum að Alþfl. hefur verið fluttur þingmannaleiðir í þá sömu átt. Þetta kemur víðar fram í yfirlýsingum þeirra. Á sama tíma og forustumenn jafnaðarmanna í Evrópu lýsa því yfir að skattahækkanir séu ekki lykillinn að lausnum framtíðarinnar koma forustumenn jafnaðarmanna dag eftir dag og í umræðunni í kvöld og segja að skattahækkanir séu eina leiðin sem þeir sjái til að auka réttlæti í þjóðfélaginu. Formaður Alþfl. hefur sérstakar áhyggjur af því í umræðunni að Ísland sé ekki í efstu sætum yfir samkeppnisstöðu þjóða. Þó höfum við færst upp um fimm sæti á undanförnum þremur árum á þeim lista. En hver er boðskapur hans í þessum efnum? Hann ætlar að leggja á stærsta útflutningsfyrirtækið á Ísafirði, svo dæmi sé tekið, 130 millj. kr. skatt, 500 þús. kr. á hvern starfsmann þess fyrirtækis. Það er úrræði hans til að bæta samkeppnisstöðu Íslands og hann kemur hér og segist hafa áhyggjur af smáfyrirtækjum í landinu en hver er boðskapur hans gagnvart smáfyrirtækjunum? Hann ætlar að leggja 500 þús. kr. skatt á hvern trillukarl í landinu.
Er þetta trúverðugur boðskapur? Þegar þjóðir heims horfa til Íslands vegna þess árangurs sem við höfum náð í sjávarútvegsmálum, vegna þess að við höfum varðveitt fiskstofnana betur en aðrar þjóðir, vegna þess að við höfum náð meiri efnahagslegum árangri í fiskveiðistjórn en aðrar þjóðir þá koma talsmenn jafnaðarmanna og segja: ,,Við ætlum að afleggja þetta kerfi.`` Þegar við höfum upprætt meginmeinsemd verðbólgunnar og stöðnunar í íslensku efnahagslífi sem var fólgin í rangri sjávarútvegsstefnu, þegar okkur hefur tekist að ná þeim árangri að sjávarútvegurinn er ein af forsendum stöðugleikans og hagvaxtarins í landinu, þá koma forustumenn jafnaðarmanna og segjast ætla að kollvarpa því kerfi sem leitt hefur til þessa árangurs.
Þegar forustumenn jafnaðarmanna hlusta á umræður um virkjun fallvatna og ný atvinnutækifæri í stóriðju þá vilja þeir binda hendur Íslands í alþjóðasamningum og þegar forustumenn jafnaðarmanna hlusta á umræður um nýsköpun þar sem gefa á menntafólkinu á Íslandi ný atvinnutækifæri eins og við erfðarannsóknir þá vilja þeir helst þvælast fyrir.
Herra forseti. Það er ekki vænlegt að ganga til móts við nýja öld undir forustu þeirra sem bara líta í baksýnisspegilinn. Við verðum að ganga til móts við nýja öld með bjartsýni og áræði í huga á þeim grunni sem við höfum verið að ná árangri og beita þeim aðferðum sem reynsla okkar og annarra þjóða hefur sýnt að færir okkur með mestum hraða fram til meiri verðmætasköpunar og gefur okkur þannig tækifæri til þess að auka velferðina í landinu. Menn bæta hana ekki með því að auka skatta og draga úr verðmætasköpun. Við verðum að horfa til nýrrar aldar með framtíðarsjónarmið í huga, með ný viðhorf í huga, en ekki með gömlum gleraugum.