[prenta uppsett í dálka] 3. fundur, 123. lþ.
Sturla Böðvarsson (andsvar):
Herra forseti. Hæstv. fjmrh. vakti athygli á mjög undarlegu bréfi sem borgarstjórinn í Reykjavík skrifaði fjárln. þar sem borgarstjórinn hafnaði því að eiga fund með fjárln. og ræða um sameiginleg málefni ríkis og borgarinnar. Þetta vakti mikla athygli á sínum tíma. En hæstv. ráðherra nefndi einnig að í undirbúningi væri að gera samning við Reykjavíkurborg um þátt hennar í menningarborgaverkefninu árið 2000 sem er hið besta mál. Ég fagna svo sannarlega því samstarfi. Það er mjög mikilvægt að Reykjavíkurborg fái öflugan stuðning af landinu öllu til að takast á við þetta verkefni. En ég vildi af þessu tilefni spyrja hæstv. fjmrh. vegna þess að byggingar framhaldsskóla eru sameiginlegt verkefni ríkis og sveitarfélaga og við vitum að framhaldsskólinn er í uppbyggingu, þ.e. Menntaskólinn í Reykjavík og svo aftur Menntaskólinn við Hamrahlíð: Hvar standa samningar milli ríkisins og Reykjavíkurborgar um þátt borgarinnar í uppbyggingu framhaldsskólanna í Reykjavík?
