[prenta uppsett í dálka] 10. fundur, 123. lþ.
Árni Johnsen:
Herra forseti. Það er rífandi lukka með þá ákvörðun ríkisstjórnarinnar að smíða nýtt varðskip á Íslandi. Þetta eru mikil fagnaðartíðindi. Þetta yrði væntanlega fyrsta stórverkefni um langt árabil í nýsmíði á Íslandi og sem betur fer, þrátt fyrir að ekki hafi árað vel í þeim efnum um alllangt skeið, þá hafa menn haldið sjó. Í landinu eru nokkrar skipasmíðastöðvar, vítt og breitt um landið, sem hafa burði til þess, ýmist sjálfstætt eða í samstarfi við aðra, að takast á við það mikla verkefni sem er að smíða nýtt varðskip og endurnýja þannig varðskipaflota landsmanna sem er löngu tímabært.
