Menntamálaráðherra (Björn Bjarnason) (andsvar):
Herra forseti. Ég held við komumst í sjálfu sér ekki lengra í þessum umræðum í dag. Varðandi hugtakið landshlutaleikhús þá hafa menn aðallega, ef ég hef spurt um hvað í því felist, bent á aðgerðir sem Norðmenn hafa gripið til í sínu landi. Það getur vel verið að það gagnist vel þar en það á nú eftir að ræða það betur og útfæra hér ef menn ætla að koma með nýtt hugtak inn í þessar umræður og leggja áherslu á það.
Leikfélag Akureyrar er merk stofnun en eins og ég hef svo margítrekað hér í þessum umræðum er ekki með neinu móti verið að vega að Leikfélagi Akureyrar með þessu frv. Þvert á móti byggist stuðningur ríkisins við Leikfélag Akureyrar á þeim samningi sem er í gildi milli ríkisvaldsins og Akureyrarbæjar um menningarstarfsemi á Akureyri. Og í frv. til fjárlaga núna er gert ráð fyrir því að auknu fé verði varið til þess að efla þetta samstarf og stuðla þannig að auknu menningarlífi á Akureyri og er það alveg án tillits til þess hvað stendur í leiklistarlögum, enda fjalla lögin ekki um slíka hluti.