[prenta uppsett í dálka] 16. fundur, 123. lþ.
Félagsmálaráðherra (Páll Pétursson) (andsvar):
Herra forseti. Það er að vísu rétt hjá hv. þingmanni að stjfrv. hafa ekki borist nógu greiðlega til þingsins. Það er slæmt. Það er kannski ekki sérstaklega við okkur í félmrn. að sakast því að við erum komin með nokkur mál inn í þingið. En í farvatninu eru enn frá minni hendi, fyrir utan þetta mál, tvö verulega mikilvæg mál, skulum við segja, sem taka einhvern tíma í umræðu og afgreiðslu á þinginu.
Það er í fyrsta lagi frv. um húsnæðissamvinnufélög sem frestað var í fyrra en hv. þingmenn þekkja. Það verður lagt fram væntanlega lítið breytt en þó með ákveðnum breytingum frá því sem var í fyrravor. Ég geri ráð fyrir því að sæmilega gott samkomulag verði um það mál. Í því er ekki nein bylting.
Í öðru lagi stendur yfir endurskoðun jafnréttislaganna. Hún er á lokastigi og ég vænti þess að koma því máli fyrir þingið innan fárra daga eða fárra vikna, skulum við segja.
