Ísólfur Gylfi Pálmason:
Herra forseti. Ég beini fyrirspurn minni til hæstv. félmrh.
Starfsemi Íþróttakennaraskólans á Laugarvatni hefur gjörbreyst eftir að lög um Kennaraháskóla Íslands voru samþykkt á síðasta þingi. Á Laugarvatni er svokölluð íþróttaskor Kennaraháskóla Íslands og því höfum við í raun fengið háskóla á Suðurland. Hér er um þriggja ára háskólanám að ræða sem lýkur með B.Ed.-gráðu og nemendur fá kennararéttindi bæði í grunn- og framhaldsskólum.
Háskóli er gjarnan þannig samfélag að þar stundar fjölskyldufólk nám. Forsvarsmenn Kennaraháskóla Íslands, þeir Þórir Ólafsson rektor í Reykjavík og dr. Erlingur Jóhannesson á Laugarvatni, hafa mikinn hug á því að reisa stúdentagarða á Laugarvatni líkt og gert hefur verið af miklum myndarskap við Samvinnuháskólann að Bifröst. Hér er um mjög brýnt mál og mikilvægt að ræða í skólastarfi á Laugarvatni. Mig langar því að spyrja hæstv. félmrh. hverjir séu möguleikar forsvarsmanna Kennaraháskóla Íslands til að byggja upp stúdentagarða á Laugarvatni. Hver er afstaða ráðherrans til þessara mála?