Ögmundur Jónasson:
Hæstv. forseti. Hér er verið að leggja mér þau orð í munn að ekkert gott vaki fyrir þeim sem hugsanlega fái rekstrarleyfið eða sérleyfi á heilsufarsupplýsingum Íslendinga. Ég hef aldrei sagt þetta og það er mjög ódrengilegt að segja þetta í lokaandsvari, þar sem ég get ekki leiðrétt málið. Ég hef aldrei sagt þetta.
Ég hef sagt að það væri ekki sambærilegt að bera saman vísindastarfsemi sem rekin væri á sama grundvelli og Krabbameinsfélagið, í þágu líknar og vísinda, og hins vegar viðskiptafyrirtækis. Ég tók það síðan fram að að sjálfsögðu hlytist margt gott af því sem gerðist á markaði á þessu sviði sem öðrum. Ég tók það sérstaklega fram.
En ég sagði hins vegar að á þessu væri grundvallarmunur. Allur málflutningur minn hér í kvöld hefur gengið út á að færa á þetta sönnur.