[prenta uppsett í dálka] 39. fundur, 123. lþ.
Svavar Gestsson (andsvar):
Herra forseti. Ég þakka hæstv. fjmrh. fyrir en þetta þakkarávarp er nokkuð seint fram komið. Viðhorf mín hafa ekki breyst um margra ára skeið og eru t.d. skráð rækilega niður í bók mína Sjónarrönd sem kom út fyrir þremur árum. Þar sagði ég að það ætti að vera algert forgangsatriði að borga niður skuldir ríkisins og þjóðarinnar. Það er úrslitamál. Í ríkisfjármálum finnst mér tvennt mikilvægast: Annars vegar að borga niður skuldir og halda þeim niðri og hins vegar að tryggja velferðarkerfið. Þetta eru atriði sem skipta jafnmiklu máli og á að leggja jafnmikla áherslu á vegna þess að ekkert velferðarkerfi verður til ef menn keyra ríkissjóð á hausinn.
