Árni M. Mathiesen (andsvar):
Herra forseti. Ekki vil ég sýna þeim hv. þm. Alþfl. sem sátu í félmrn. ósanngirni. Staðreyndin er hins vegar sú að vandi eins og sá sem við sjáum fyrir okkur í málefnum fatlaðra verður ekki til á einu kjörtímabili. Þeir sem sátu í ráðuneytinu í eins langan tíma og ráðherrar Alþfl. gerðu hljóta að bera mikla ábyrgð á þeirri stöðu.
Ég ætla ekki að fara að rífast um staðreyndir við hv. þm. Rannveigu Guðmundsdóttur. Mig minnir hins vegar að Framkvæmdasjóður fatlaðra hafi fyrst verið skertur á árinu 1994 og það ár sat ráðherra Alþfl. í félmrn.