Tómas Ingi Olrich (andsvar):
Herra forseti. Það stendur ekki til í sambandi við það frv. sem hér er til umræðu að samkeyra við miðlægan gagnagrunn grunna sem efnt hefur verið til með rannsóknum á fólki og með upplýstu samþykki. Það stendur ekki til og hefur aldrei staðið til (Gripið fram í.) að samkeyra slíka grunna við þessar upplýsingar öðruvísi en fullkomið umboð sé í hinu upplýsta samþykki til þess. (HG: Hvernig á að afla þess?) Hvernig á að afla þess? Það er bara gert nákvæmlega eins og í þeim rannsóknum sem hingað til hafa verið gerðar. Hv. þm. hristir höfuðið og þá spyr ég: Hvaðan hefur hann þær upplýsingar að ekki standi til afla upplýsts samþykkis til allrar slíkrar samkeyrslu? Hann hefur þá a.m.k. meiri skyggnigáfu en ég. (Gripið fram í: Hver á að fylgjast með þeim?) Það er spurt utan úr sal: ,,Hver á að fylgjast með þeim?`` Þeim hverjum? (Gripið fram í.) Að sjálfsögðu er það fólgið í því að tölvunefnd hefur eftirlit með þessu og fylgir því eftir að staðið sé við allar reglur.