[prenta uppsett í dálka] 43. fundur, 123. lþ.
Frsm. meiri hluta efh.- og viðskn. (Vilhjálmur Egilsson):
Hæstv. forseti. Ég mæli fyrir brtt. við frv. til laga um söfnunarsjóð lífeyrisréttinda. Þessi tillaga er flutt af hv. þm. Ágústi Einarssyni ásamt mér. Þarna er á ferðinni tæknileg breyting. Í 3. mgr. 10. gr. frv. segir, með leyfi forseta:
,,Heimilt er sjóðfélaga að fresta töku ellilífeyris allt til 70 ára aldurs og hækkar þá upphæð ellilífeyris frá því sem segir í 1. mgr. í samræmi við tryggingafræðilegt mat fyrir hvern mánuð sem töku lífeyris er frestað.``
Í 1. mgr. 10. gr. er þannig komist að orði, með leyfi forseta:
,,Hver sjóðfélagi sem orðinn er fullra 67 ára að aldri á rétt á ellilífeyri úr sjóðnum.``
Til þess að 3. mgr. hafi einhverja merkingu er rétt að hafa hana eins og segir í brtt., með leyfi forseta:
,,Heimilt er sjóðfélaga að fresta töku ellilífeyris allt til 70 ára aldurs og hækkar þá upphæð ellilífeyris frá því sem annars yrði skv. 1. mgr. í samræmi við tryggingafræðilegt mat fyrir hvern mánuð sem töku lífeyris er frestað.``
Flóknara er þetta ekki, hæstv. forseti og ég hygg að þingheimur muni geta stutt þessa brtt.
