Sólveig Pétursdóttir:
Virðulegi forseti. Að gefnu tilefni vil ég segja það að í umræðum og gögnum málsins hefur komið skýrt fram að frv. var ekki gerbreytt milli 2. og 3. umr. þannig að þeir hv. þm. sem hafa áður verið jákvæðir í þessu máli geta ekki haft það sem afsökun fyrir breyttri afstöðu sinni.
Ég hef áður sagt í umræðum um þetta frv. að miðlægur gagnagrunnur getur orðið öflugt tæki til vísindarannsókna og geti skilað mikilli læknisfræðilegri þekkingu. Sú þekking mun nýtast til skilnings á eðli og umfangi sjúkdóma, gefa vísbendingar um nýjar leiðir til lækninga og varna og getur orðið öflugt tæki til að meta árangur og kostnað í heilbrigðiskerfinu. Það er trú mín að þetta mál eigi eftir að verða afar mikilvægt fyrir íslenskt þjóðfélag. Því segi ég já.