Forseti (Sturla Böðvarsson):
Vegna þeirra spurninga sem hv. þm. bar upp við forseta er rétt að vekja athygli á því að þrátt fyrir það að forseti hafi töluvert um þinghaldið að segja þá gilda hér þingskapalög og 20. gr. þeirra hljóðar svo:
,,Nefndarfundi skal ekki halda þegar þingfundur stendur yfir. Frá þessu má þó víkja ef nefndarmenn samþykkja og forseti hreyfir ekki andmælum.``
Þetta er sú meginregla sem við vinnum eftir hér á Alþingi og frá henni er ekki vikið nema, eins og hér segir, að um það sé samkomulag og forseti leyfi. Forseti vill benda á það vegna þessarar umræðu.
Um aðra hluti sem hv. þm. nefndi tel ég rétt að ræða á þeim fundi sem forseti hefur sagt frá að boðaður verði innan tíðar. Forseti sér ekki ástæðu til að fara fleiri orðum um það.