[prenta uppsett í dálka] 53. fundur, 123. lþ.
Hjörleifur Guttormsson (andsvar):
Virðulegur forseti. Það er auðvitað nauðsynlegt þegar rætt er um þetta álitaefni, stofnanir háskólans sem hafa vaxið upp til hliðar við deildir háskólans á undanförnum árum --- ég hef fylgst með þessari þróun því að þetta var ekki til fyrir nokkrum árum, ég tala nú ekki um þegar ég kom fyrst inn á þing. Þá vorum við á Alþingi að leita til Háskóla Íslands, til deildarmanna eða beindum erindum til Háskóla Íslands og þá veigruðu menn sér við því þegar þessum erindum fjölgaði að sinna þessum störfum og fá ekkert fyrir. Þá þróast það eðlilega og er svo sem ósköp tengt ýmissi annarri þróun í samfélaginu að þessi fyrirtæki eru stofnuð til að skapa farveg fyrir útsölu á vinnu þeirra sem taka að sér verkefni. Út af fyrir sig er ekkert við það að athuga. Það sem er við að athuga og ég hef gert athugasemdir við, er að menn leggi annan skilning í eðli þessara fyrirtækja starfsmanna við Háskóla Íslands í einstökum deildum, að menn leggi einhvern annan skilning í það heldur en ber. Þetta eru fyrirtæki sem eru að selja út hugmyndir sem einstakir tilgreindir aðilar þar standa ábyrgir fyrir. Þetta eru ekki fræðilegar álitsgerðir sem deildir háskólans standa að heldur eru þetta sjónarmið og niðurstöður tilgreindra ágætra heiðursmanna sem skrifa undir það. Því miður er það svo að verið er að fara með þetta þannig að það er verið að eyðileggja þetta. Ég nefndi álitsgerð sem tengdist gagnagrunni á heilbrigðissviði. Hún átti að vera eitthvert þungavigtarplagg í því samhengi og var þannig farið með hana í þeirri umræðu að það ætti að vekja athygli alþjóðar á því. Ég sem sagt hef verulega annan skilning á þessu máli en mér heyrist hv. þm. hafa og tel að hann þurfi að skoða betur innviði þessara stofnana og tengsl við það sem við köllum Háskóla Íslands.
