[prenta uppsett í dálka] 83. fundur, 123. lþ.
Hjörleifur Guttormsson:
Virðulegur forseti. Eins og þetta mál er lagt fyrir Alþingi er það að mínu mati í raun ekki tækt til afgreiðslu. Hér er verið að leggja til að hefja hvalveiðar við Ísland hið fyrsta án nokkurra frekari skilgreininga hvað að baki liggur.
Á það hefur verið bent að stór munur er á því hvort menn taka einstök dýr, kannski í rannsóknarskyni af hrefnustofni, eða hvort menn eru að fara í stórhvalaveiðar. Ég tel að það væri glapræði að fara í slíkar veiðar eins og mál standa og án þess að frekari greining á málinu liggi fyrir. Ég tek undir 2. mgr. tillögunnar og styð það að Alþingi leggi áherslu á óskoraðan fullveldisrétt Íslands til þess að taka lífverur úr sjónum hvort sem það eru fiskar eða hvalir. En að álykta um að hefja hvalveiðar hið fyrsta á þeim forsendum sem hér liggja fyrir er fráleitt með öllu. Ég greiði atkvæði gegn 1. og 3. mgr. þessarar tillögu og gegn tillögunni í heild sinni.
Þetta vil ég að liggi fyrir, virðulegur forseti. Að öðru leyti hef ég skýrt mitt mál í umræðu. Ég tel t.d. að tilvísun til samþykktar 1983 hafi ekkert að gera inn í þessa ályktun hvernig sem á málið er litið.
