Ferill 214. máls. Aðrar útgáfur af skjalinu: Word Perfect.
123. löggjafarþing 1998–99.
Þskj. 401 — 214. mál.
Svar
forsætisráðherra við fyrirspurn Guðmundar Árna Stefánssonar um ný störf á vinnumarkaði.
Fyrirspurnin hljóðar svo:
Hversu mörg ný störf (raunaukning) hafa orðið til á vinnumarkaðinum hérlendis á kjörtímabilinu, sundurliðað eftir kjördæmum og atvinnugreinum (opinber störf, framleiðslustörf, þjónusta o.s.frv.)?
Hver hefur orðið heildartilfærsla vinnuafls eftir kjördæmum og atvinnugreinum á sama tíma?
Nákvæmustu upplýsingar um atvinnugreinaskiptingu eftir svæðum eru unnar upp úr upplýsingum af launamiðum sem fylgja skattframtölum. Nýjustu upplýsingar af þeim toga eru fyrir árið 1996. Upplýsinga um ný störf á vinnumarkaði þar sem hægt væri að greina þau eftir atvinnugreinum og landsvæðum er ekki aflað sérstaklega. Nýrri upplýsingar byggja á könnunum Þjóðhagsstofnunar á ástandi vinnumarkaðarins. Allar upplýsingar um vinnumarkað á Íslandi eru að einhverju leyti ófullkomnar og því verður að taka þeim upplýsingum sem hér eru veittar með fyrirvara.
Í töflu 1 er sýnd breyting á fjölda starfa milli áranna 1994 og 1996 eftir atvinnugreinum og landsvæðum. Samkvæmt þessum upplýsingum fjölgaði störfum á tveimur fyrstu árum kjörtímabilsins um rúmlega 3.900 eða 3,2%. Fjölgun starfa á höfuðborgarsvæðinu, sem myndar einn vinnumarkað og er því talið í einu lagi, er 3.247. Störfum fækkar á Vestfjörðum, Norðurlandi vestra og Austurlandi á tímabilinu.
Ef tafla 1 er skoðuð nánar sést að í vissum atvinnugreinum og landsvæðum hefur orðið fjölgun en annars staðar fækkun. Sums staðar er ástæðan raunar ónákvæmni gagnanna, eins og þegar hefur verið bent á. Í tveimur neðstu línum töflunnar hafa verið lagðar saman annars vegar þær atvinnugreinar sem hafa vaxið í hverjum landshluta og hins vegar þær sem hafa dregist saman. Á sama hátt eru tveir dálkar töflunnar lengst til hægri gerðir þannig í hverri atvinnugrein hafa verið tekin saman þau landsvæði þar sem vöxtur eða samdráttur hefur orðið. Samkvæmt þessum útreikningum er fjöldi nýrra starfa á tímabilinu rúmlega 6.000 en rúmlega 2.000 störf hafa horfið. Það skal tekið fram að þessi mæling er mjög háð atvinnugreina- og svæðaskiptingu.
Í töflu 2 er sýnd þróun á fjölda ársverka frá 1994 til 1998. Tvö seinni ár tímabilsins eru áætluð. Er það gert á grundvelli athugana Þjóðhagsstofnunar á ástandi á vinnumarkaðinum. Þessi áætlun er ekki til með landfræðilegri skiptingu. Samkvæmt þessum upplýsingum hefur störfum fjölgað frá 1994 til 1998 um 9.670 eða 7,9%. Samdráttur er í fjórum greinum: landbúnaði, fiskveiðum, fiskiðnaði og störfum í þjónustu varnarliðsins, samtals um rúmlega 2.000 störf. Vaxtargreinarnar hafa því vaxið samtals um rúmlega 11.700 ársverk frá 1994. Til viðbótar kemur að sumar greinar sem vaxið hafa frá 1994 náðu lágmarki í mannaflanotkun á tímabilinu. Munar þar rúmlega 750 störfum. Samtals teljast þannig hafa orðið til tæplega 12.500 ný störf frá 1994 til 1998.
Ekki eru tiltækar upplýsingar um hvernig breyting á fjölda starfa skiptist eftir landshlutum fyrir sama tímabil. Sé hins vegar horft til þess að þær greinar sem dregist hafa saman eru hlutfallslega mikilvægar í landsbyggðarkjördæmunum er hægt að álykta að þar hafi orðið samdráttur í atvinnu en að vöxturinn sé að mestu bundinn við höfuðborgarsvæðið.
Hér er myndað efni sem sést ekki í vefútgáfu
Tafla 2. Fjöldi ársverka á vinnumarkaði 1994–98, skipt eftir atvinnugreinum (Þjóðhagsstofnun). | ||||||
1994 |
1995 |
1996 |
Áætl. 1997 |
Áætl. 1998 |
Breyting 1994–98 |
|
11 Landbúnaður | 5.621 | 5.596 | 5.349 | 5.310 | 4.810 | -811 |
13 Fiskveiðar | 6.556 | 6.396 | 6.462 | 6.015 | 5.840 | -716 |
30 Fiskiðnaður | 7.183 | 7.339 | 7.546 | 6.957 | 6.678 | -505 |
31 Annar matvælaiðnaður | 3.715 | 3.666 | 3.830 | 3.797 | 4.003 | 288 |
32 Vefjar-,skó- og fataiðnaður | 1.205 | 1.266 | 1.357 | 1.361 | 1.363 | 159 |
33 Trjávöruiðnaður | 1.092 | 1.090 | 1.143 | 1.171 | 1.303 | 211 |
34 Pappírsiðnaður | 2.080 | 2.210 | 2.288 | 2.385 | 2.357 | 277 |
35 Efnaiðnaður | 1.058 | 1.088 | 1.110 | 1.182 | 1.260 | 201 |
36 Steinefnaiðnaður | 790 | 817 | 745 | 946 | 1.034 | 245 |
37 Ál- og kísiljárnframleiðsla | 691 | 673 | 689 | 803 | 862 | 171 |
38 Málmsmíði og viðgerðir | 2.356 | 2.513 | 2.787 | 3.084 | 3.148 | 792 |
39 Ýmis iðnaður og viðgerðir | 624 | 699 | 767 | 828 | 950 | 326 |
4 Rafmagns- og vatnsveitur | 1.297 | 1.364 | 1.415 | 1.449 | 1.511 | 214 |
50 Byggingarstarfsemi | 10.364 | 9.783 | 9.810 | 11.671 | 11.758 | 1.394 |
6 Verslun | 14.299 | 14.760 | 15.207 | 15.945 | 16.280 | 1.980 |
63 Veitinga- og hótelrekstur | 3.618 | 3.592 | 3.834 | 3.681 | 3.951 | 333 |
71 Samgöngur | 5.976 | 6.186 | 6.488 | 6.690 | 7.193 | 1.216 |
72 Póstur og sími | 2.208 | 2.242 | 2.257 | 2.280 | 2.229 | 21 |
81 Peningastofnanir og tryggingar | 4.798 | 4.777 | 4.845 | 4.753 | 4.913 | 115 |
83 Fasteignarekstur og þjónusta | 5.735 | 5.826 | 6.200 | 6.120 | 6.206 | 470 |
96 Varnarliðið | 923 | 912 | 908 | 868 | 875 | -49 |
Ýmis þjónusta einkaaðila | 8.635 | 8.703 | 8.453 | 8.621 | 8.501 | -134 |
Starfsemi fyrirtækja alls | 90.826 | 91.496 | 93.490 | 95.917 | 97.025 | 6.200 |
Starfsemi hins opinbera | 24.351 | 24.499 | 25.018 | 25.595 | 26.861 | 2.509 |
Önnur starfsemi | 6.976 | 7.132 | 7.404 | 7.584 | 7.740 | 764 |
Atvinnugrein ótilgreind | 507 | 589 | 674 | 560 | 705 | 198 |
Starfandi alls | 122.660 | 123.716 | 126.586 | 129.656 | 132.330 | 9.670 |