Ferill 524. máls. Aðrar útgáfur af skjalinu: Word Perfect.
123. löggjafarþing 1998–99.
Þskj. 1013 — 524. mál.
Svar
dómsmálaráðherra við fyrirspurn Kristínar Ástgeirsdóttur um eftirlit með vændi.
Fyrirspurnin hljóðar svo:
1. Hvernig er fylgst með umfangi og eðli vændis hér á landi?
2. Hefur verið gerð könnun á vændi hérlendis á undanförnum árum?
3. Hversu margar ábendingar eða kærur vegna vændis hafa borist yfirvöldum undanfarin fimm ár?
4. Er ástæða til að ætla að hafin sé „útgerð“ á erlendum stúlkum hér á landi, einkum frá Austur-Evrópu?
5. Eru fyrirhugaðar lagabreytingar eða sérstakar aðgerðir til að sporna við vændi, sbr. nýlega löggjöf í Svíþjóð sem m.a. bannar kaup á blíðu kvenna og karla?
Þann 18. febrúar sl. óskaði dómsmálaráðuneytið eftir upplýsingum frá öllum lögreglustjórum og ríkissaksóknara um þau atriði sem framangreind fyrirspurn lýtur að. Óskað var eftir yfirliti viðkomandi embættis um fjölda þeirra kæra sem borist hafa embættinu vegna brota á 206. og 208. gr. almennra hegningarlaga undanfarin fimm ár, svo og fjölda ákæra sem gefnar hafa verið út í kjölfarið. Einnig var óskað eftir upplýsingum um hvort haft væri sérstakt eftirlit með þessum brotaflokki eða annarri brotastarfsemi sem rekin er í tengslum við vændi og hvort slík mál tengdust sérstaklega stúlkum frá Austur-Evrópu.
Svör bárust frá öllum embættunum. Er skemmst frá því að segja að svör lögreglustjóra utan Reykjavíkur eru í meginatriðum samhljóða. Verður vikið sérstaklega að svari lögreglustjórans í Reykjavík hér á eftir.
Lögreglustjórar utan Reykjavíkur hafa ekki talið þörf á sérstöku eftirliti með vændi í umdæmum sínum, en fylgst er með slíkum brotum með sama hætti og öðrum brotum. Þessum embættum hafa ekki borist neinar ábendingar eða kærur vegna vændis á umræddu tímabili og viðkomandi lögreglustjórar telja sig ekki hafa ástæðu til að ætla að þar sé hafin „útgerð“ á erlendum vændiskonum.
Í svari lögreglustjórans í Reykjavík kemur fram að frá árinu 1994 hafi 17 mál vegna ætlaðra brota á 206. gr. almennra hegningarlaga verið tilkynnt til lögreglu.
Lögreglustjóraembættið í Reykjavík hefur fylgst skipulega með þeim svokölluðu nektardansstöðum sem starfræktir eru í Reykjavík, þ.m.t. hvort skipulagt vændi fari þar fram. Hefur ekkert komið fram sem staðfestir orðróm um slíka starfsemi.
Ráðuneytinu er ekki kunnugt um neinar kannanir sem gerðar hafa verið á vændi hérlendis á undanförnum árum.
Á vegum ráðuneytisins er starfandi refsiréttarnefnd sem m.a. hefur það hlutverk að endurskoða almenn hegningarlög, nr. 19/1940. Lagabreytingar til að sporna við vændi eru meðal þeirra mála sem nefndin hefur til athugunar, en engar ákvarðanir hafa verið teknar í þessum efnum.
