Arnbjörg Sveinsdóttir (andsvar):
Hæstv. forseti. Hv. þm. Katrín Fjeldsted telur það vera siðferðislega ábyrgð Alþingis að umhverfismat fram fari á Fljótsdalsvirkjun. Ég hlýt að spyrja hvar þessi siðferðislega ábyrgð sé við aðrar framkvæmdir á hálendi Íslands og hvort þingmenn Reykvíkinga hafi séð ástæðu til þess að kalla eftir slíkri siðferðislegri ábyrgð þegar fram hafa farið aðrar framkvæmdir og virkjunarframkvæmdir á hálendinu sunnanlands? Hefur þetta kannski eitthvað með það að gera í hvaða kjördæmi menn eru? Ég hlýt að spyrja að því. Og einnig að því hvað hv. þm. Katrín Fjeldsted ætlar sér að fá fram með slíku umhverfismati.