Arnbjörg Sveinsdóttir (andsvar):
Hæstv. forseti. Hv. þm. Össur Skarphéðinsson hefur skilgreint hér mjög afstöðu annarra þingflokka og farið djúpt í skilgreiningar á því hver afstaða manna er til málsins í öllum þingflokkum nema Samfylkingunni. Nú þætti mér afskaplega vænt um að fá skilgreiningu hv. þm. á því hver afstaða Samfylkingarinnar sé til málsins því að í kosningabaráttunni á Austurlandi kom mjög skýrt fram að Samfylkingin hafði ekki áhuga á því að fram færi umhverfismat á Fljótsdalsvirkjun.
Vegna þess að hér er verið að tala um skuld við kjósendur þá þætti okkur, sem áttum þess kost að taka þar þátt í mjög skemmtilegri og ágætri kosningabaráttu, gaman að fá að heyra hver afstaða Samfylkingarinnar er því að mér finnst hún vera nokkuð önnur í máli hv. þm. Össurar Skarphéðinssonar en hjá ræðumönnum Samfylkingarinnar í kosningabaráttunni á Austurlandi nú fyrir mjög skömmu síðan.