Ögmundur Jónasson:
Hæstv. forseti. Ég tek undir með hv. þm. Kolbrúnu Halldórsdóttur um að eðlilegt er að Alþingi taki þetta mál til afgreiðslu núna og það liggur á að gera það núna. Núna eru fulltrúar erlendra stóriðjufyrirtækja staddir hér á landi og hafa verið eins og gráir kettir í landinu á sjónvarpsskjánum á undanförnum dögum að ræða þessar framkvæmdir. Það liggur á að Alþingi láti frá sér heyra ef einhver alvara er að baki yfirlýsingum hv. formanns umhvn. að hann vilji að virkjunin fari í umhverfismat og þá á hann að beita sér fyrir því. Hann er hins vegar að aðstoða hæstv. iðnrh. við að drepa þessu máli á dreif og það er algerlega óþolandi að Framsfl. og hv. formaður umhvn. komist upp með að spila pólitískt pókerspil í þessu máli.