Pétur H. Blöndal (andsvar):
Herra forseti. Hæstv. fjmrh. fór í gegnum kosti þessarar nýju matsskrár og þeir eru umtalsverðir fyrir atvinnulífið út um allt. Við erum að taka upp rafræna skráningu verðbréfa og það stefnir í að stóri bróðir sé með allar eignir landsmanna í takinu og hér hefur verið rætt mjög mikið um verndun persónuupplýsinga í heilbrigðiskerfinu og þar eru tekin upp mjög ströng ákvæði um dulkóðun en á sama tíma er ríkisvaldið að stórauka aðgang að upplýsingum um eignir manna og skuldir. Hér á að rekja allar veðskuldir o.s.frv. Meira að segja viðhaldssögu fasteigna. Allt í góðu gert.
Ég spyr hæstv. fjmrh. vegna þess að ekki er orð um það í frv., a.m.k. gat ég ekki fundið það, að menn hefðu áhyggjur af persónuupplýsingum og verndun þeirra: Hvar stendur einstaklingurinn gagnvart ríkinu þegar við erum komin með svona mikið batterí?