Pétur H. Blöndal (andsvar):
Herra forseti. Hvaða áhrif telur hæstv. ráðherra að þetta frv., ef það verður að lögum, muni hafa á starfandi gagnagrunna, t.d. þjóðskrána, þar sem eru persónugreinanlegar upplýsingar t.d. um aldur og búsetu? Hvaða áhrif hefur þetta á hinn nýja gagnagrunn sem við ræddum um í gær, þ.e. skráningu fasteigna yfir allt landið og hvaða áhrif hefur þetta á grunna eins og krabbameinsskrána og fjölda annarra grunna sem við höfum í dag? (ÖJ: Gagnagrunn á heilbrigðissviði?) Hann er reyndar persónuógreinanlegur, herra forseti. En persónugreinanlegir grunnar eru til mjög víða og hvaða áhrif hefur það t.d. á grunna sem geymdir eru í Reiknistofu bankanna svo fáein dæmi séu nefnd?