Umhverfisráðherra (Siv Friðleifsdóttir) (andsvar):
Virðulegur forseti. Það er rétt hjá hv. þm. Það er búið að kæra okkur á vettvangi Evrópusambandsins vegna Fljótsdalsvirkjunar vegna ágreinings um þetta undanþáguákvæði. Við höfum svarað þeim spurningum varðandi það sem til okkar í ráðuneytinu hafa komið. Hins vegar er alveg ljóst að aðalatriðið í þessu er að lög eru almennt ekki afturvirk.
Við fórum mjög nákvæmlega yfir þetta í umræðunni um Fljótsdalsvirkjun skömmu fyrir jól. Niðurstaða þingsins var í fyrsta lagi að hafna því að fara í lögformlegt umhverfismat, það var gert með meirihlutaákvörðun. Síðan var samþykkt að halda áfram með framkvæmdirnar sem hafnar eru. Það var gert með meiri þingstyrk en stjórnarflokkarnir hafa á bak við sig. Ég tel að það skýri mjög vel hver er vilji Alþingis í þessu máli.