[prenta uppsett í dálka] 72. fundur, 125. lþ.
Ögmundur Jónasson (andsvar):
Herra forseti. Ég leyfi mér nú að fullyrða að enginn stjórnmálaflokkur að undanskildum Frjálslynda flokknum, sem reyndar var einnig hógvær í kosningabaráttu sinni, og húmanistar, sem ekki fengu mann kjörinn, hafi verið eins hógvær og passasamur í meðferð fjármuna og Vinstri hreyfingin -- grænt framboð. Ekki er stuðningurinn frá fyrirtækjum í landinu mikill miðað við það sem gerist hjá öðrum stjórnmálaflokkum og því fjarri lagi að halda fram að einstök fyrirtæki hafi áhrif á gang mála innan Vinstri hreyfingarinnar -- græns framboðs, en það fullyrti hv. þm. Kristján Pálsson. Hann sagði og gaf það sterklega í skyn að Vinstri hreyfingin -- grænt framboð léti stjórnast af fyrirtækjum sem styddu hreyfinguna.
Ég beini einni einfaldri spurningu til hv. þm.: Kannast hann við orðtakið ,,margur heldur mig sig``?
