Sighvatur Björgvinsson:
Herra forseti. Þessi tillaga fjallar um staðfestingu á Schengen-samkomulaginu en ekki um einstök framkvæmdaratriði að þeim samningum samþykktum. Hér er um að ræða eitt stærsta utanríkismál sem komið hefur til kasta Íslendinga síðan EES-samningurinn var samþykktur. Hér er um að ræða ákvörðun Íslendinga um að taka áframhaldandi þátt, stíga næsta skref í samstarfi Evrópuþjóðanna um frjálsa för fólks. Þarna er um það að ræða að við tökum þátt í því samstarfi á jafnréttisgrundvelli með sömu réttindum til að hafa áhrif á ákvarðanatöku og aðrar þjóðir sem standa að samningnum, þar á meðal þjóðirnar í Evrópusambandinu.
Herra forseti. Ég segi já.