Umhverfisráðherra (Siv Friðleifsdóttir):
Virðulegur forseti. Það eru nokkur atriði sem hér hafa komið fram í umræðunni sem ég vil nefna sérstaklega. Hv. þm. Guðmundur Árni Stefánsson hefur miklar efasemdir um að réttmætt sé að afnema stjórnina. Hann tíndi það til að þar sem stjórnir eru þar sé meiri metnaður. Ég hef ekki séð neitt samhengi á milli þess að þar sem stjórnir eru sé meiri metnaður en þar sem ekki eru stjórnir. Ég sé þar ekkert samhengi.
Ég tel best að hafa ábyrgðarsvið forstjóra mjög skýrt og þar sé ekki stjórn sem er hálfgerður milliliður á milli forstjóra og ráðherra. Það skapar mörg grá svæði og þurrkar út ábyrgð t.d. forstöðumannanna eða þurrkar út ábyrgð stjórna á hinn bóginn. Því er betra fyrir starfsemina að hafa ekki stjórn og ég held að nú sé þannig komið að einungis ein stofnun undir umhvrn. hafi yfir sér stjórn. Ef ég man rétt er aðeins stjórn yfir Landmælingum ríkisins. Það var réttlætt að einhverju leyti með flutningi þeirrar stofnunar, að hafa þyrfti stjórn til að fylgjast með henni. Ég hef hins vegar miklar efasemdir um að viðhalda eigi þeirri stjórn og mun endurskoða það.
Varðandi skólann þá var hér rætt um endurmenntun og símenntun. Það má segja að farskólinn hafi að einhverju leyti sinnt þessu með starfsemi sinni undanfarið. Farskólinn verður hluti af Brunamálaskólanum. Í dag er farskólinn rekinn sjálfstætt frá Brunamálaskólanum má segja en skólarnir verða felldir í einn og sama skólann með þessum breytingum. Hér má einnig benda á að skólaráðið er Brunamálastofnun til ráðgjafar um fagleg og rekstrarmálefni skólans og ber ábyrgð gagnvart brunamálastjóra og framkvæmd á starfsemi Brunamálaskólans. Ég hef því ekki áhyggjur af þessari sí- og endurmenntun þar sem skólaráðið mun hafa mikið um starfsemi skólans að segja. Ég tel því að við þurfum ekki að hafa áhyggjur af þessu.
Varðandi sameiningu slökkviliða þá er það rétt að ekki er eðlilegt að sameina slökkvilið sem mjög langt er á milli en sveitarfélögin ráða þessu. Hér er enginn að þvinga sveitarfélögin til eins né neins. Við erum að hvetja sveitarfélögin til þess að skoða þetta og ætlum að bjóða upp á fjárhagsstuðning til þess að gera þetta mögulegt. Ég tel að við séum að stíga mjög jákvætt skref sem mun auka öryggi fólks gagnvart eldsvoðum og minnka eignatjón.
Hv. þm. Guðmundur Árni Stefánsson sagði að menn mundu ekki sigra á sameiningunni einni saman. Mér fannst þetta nokkuð skondið þar sem ég veit ekki betur en Samfylkingin er svona að mörgu leyti hugsuð þannig. (GÁS: ... á sameiningu einni saman.) Á sameiningu einni saman, það eru þau rök sem flokkarnir sem eru að sameinast í Samfylkingunni hafa notað, að sameinast í einn stóran flokk til þess að hafa eitthvert afl. Það má segja að hið sama gildi um þetta. Með því að sameinast eru talsverðar líkur á því að hægt sé að auka öryggi og minnka eignatjón. En þetta þarf að skoðast í hverju tilfelli fyrir sig.
Varðandi falska öryggið sem hv. þm. kom inn á þá vil ég taka undir það að maður skyldi ekki skapa falskt öryggi. Ég vil hins vegar benda á ákvæði í 13. gr. Þar eru nýmæli um brunavarnaráætlun en þar segir að á hverju starfssviði slökkviliðs skuli liggja fyrir brunavarnaráætlun sem hlotið hafi samþykki Brunamálastofnunar. Hana á að endurskoða á fimm ára fresti. Áætlunin á að tryggja að slökkvilið er þannig mannað, skipulagt, útbúið tækjum, menntað og þjálfað að það ráði við þau verkefni sem því eru falin samkvæmt þessum lögum. Með brunavarnaáætluninni styrkjum við verulega starfsemina og aukum öryggið um leið. Hér er um nýmæli að ræða sem hefur mjög mikið að segja.
Það er rétt sem hv. þm. Guðmundur Árni Stefánsson sagði um að við höfum búið frekar vel í þessum málefnum. Það hefur verið sýnt fram á að hér er minna um brunatjón en í nágrannalöndunum. Það er talið vera vegna þess að hlutfall gamalla húsa er lágt. Steinsteypa er algeng. Það er lítið um stórar byggingar og mörg sérbýli þannig að okkur hefur farnast nokkuð vel hér varðandi þessi mál.