Frsm. meiri hluta sjútvn. (Einar K. Guðfinnsson):
Virðulegi forseti. Ég mæli hér fyrir nál. um frv. til laga um breytingu á lögum nr. 38, frá 11. maí 1998, um stjórn veiða úr norsk-íslenska síldarstofninum. Nál. undirritaði meiri hluti hv. sjútvn.
Nefndin fjallaði um málið og fékk á sinn fund allnokkra gesti sem nefndir eru í áliti nefndarinnar.
Í lögunum um stjórn veiða úr norsk-íslenska síldarstofninum er kveðið á um framsal veiðiheimilda í c-lið 2. gr. og segir þar orðrétt, með leyfi forseta:
,,Innan hvers árs er heimilt að framselja ákveðinn hluta árlegs aflahámarks hvers skips miðað við aflareynslu þess við veiðar úr norsk-íslenska síldarstofninum á þremur síðustu vertíðum og leyfilegan heildarafla hvers árs. Skal það magn, sem heimilt er að framselja, nema 50% af sama hlutfalli heildarveiðiheimilda og nam hlutdeild sama skips í heildarafla síðustu þriggja síldarvertíða.``
Með þessu frv. sem við nú ræðum er lagt til að aflétt verði takmörkunum á heimild til flutnings aflahámarks af skipum sem stunduðu síldveiðar á viðmiðunarárunum 1995, 1996 og 1997 og skipum sem hafa komið í þeirra stað. Hins vegar er skýrt kveðið á um að ekki megi framselja veiðiheimildir af skipum sem ekki stunduðu síldveiðar á viðmiðunarárunum eða komið hafa í stað þeirra. Er tilgangurinn með því að koma í veg fyrir að sótt verði um veiðileyfi og aflahámark fyrir skip í þeim eina tilgangi að flytja af þeim aflahámarkið.
Ástæða er til að vekja athygli á því að samkvæmt gildandi lögum skal sjávarútvegsráðherra fyrir 1. nóvember næstkomandi leggja fyrir Alþingi frumvarp um stjórn veiða úr norsk-íslenska síldarstofninum eftir árið 2000. Því má vænta þess að breytingar verði á lögunum sem hafi áhrif á veiðistjórnina þegar á næsta ári. Það er þess vegna ljóst að það fyrirkomulag sem hér er verið að leggja til mun að stofni til fyrst og fremst gilda fyrir yfirstandandi ár og í sjálfu sér mun það ekki mynda þess vegna sérstakan stofn til frekari úthlutunar á aflaheimildum. Um það verður væntanlega tekin sérstök ákvörðun með því frv. sem lagt verður fram að öllu óbreyttu á næsta hausti.
Þess vegna er ástæða til þess að vekja athygli á því að það fyrirkomulag sem nú er verið að leggja til í þessu frv. er fyrirkomulag sem eingöngu er ætlað að standi á þessu ári og það sé þannig á valdi Alþingis að gera þær breytingar sem þingið kýs á þessari löggjöf, að sjálfsögðu eins og alltaf er, og í sjálfu sér er þetta ástand, þetta fyrirkomulag, sem hér er verið að leggja til enginn sjálfgefin stofn til þeirrar úthlutunar sem verður viðhöfð eftir að sú lagasetning á sér stað. Það er á valdi Alþingis að ákveða þar um.
Undir nefndarálitið rita auk formanns og framsögumanns, þess sem hér stendur, hv. þm. Kristinn H. Gunnarsson, Hjálmar Árnason, Árni Ragnar Árnason og Vilhjálmur Egilsson. Enn fremur ritar hv. þm. Guðmundur Hallvarðsson undir nefndarálitið, en með fyrirvara. Meiri hlutinn mælir með því að frv. verði samþykkt óbreytt.