Þórunn Sveinbjarnardóttir:
Herra forseti. Lög um útlendinga frá 1965 eru skýrt mörkuð þeim forneskjulega hugsunarhætti sem gætt hefur í garð útlendinga hér á landi til skamms tíma.
Hv. þm. Ásta Ragnheiður Jóhannesdóttir er að vekja máls á óeðlilegri og ósanngjarnri málsmeðferð við heimsóknir útlendinga hingað til lands. Og ég verð að segja eins og er, herra forseti, að ég furða mig á ummælum hæstv. ráðherra um að forðast straum útlendinga til landsins. Hæstv. ráðherra talar um að hingað gæti komið fólk frá fátækum löndum og lent á vonarvöl. Á hvaða leið er hæstv. dómsmrh.? Ég vil líka benda hæstv. dómsmrh. á það og hv. þm. Ástu Möller að það er ekki allt til eftirbreytni sem gert er í nágrannalöndunum.