Frsm. allshn. (Þorgerður K. Gunnarsdóttir):
Virðulegi forseti. Ég mæli fyrir nál. frá hv. allshn. um frv. til laga um breyting á lögreglulögum, nr. 90/1996.
Með frv. er í fyrsta lagi lögð til ákveðin rýmkun á inntökuskilyrðum í Lögregluskóla ríkisins, þ.e. að valnefnd skólans verði veitt meira svigrúm við ákvörðun um inntöku lögreglumanna inn í skólann.
Í örðu lagi er markmiðið að gera nám og þjálfun lögreglumannanna skilvirkari og um leið samfelldari. Markmiðið með þessum breytingum er að faglærðum lögreglumönnum fjölgi en ófaglærðum mönnum í lögreglunni hefur fjölgað á undanförnum árum.
Við fengum á fund nefndarinnar nokkra gesti, þar á meðal Arnar Guðmundsson frá Lögregluskóla ríkisins, Jónas Magnússon frá Landssambandi lögreglumanna og Þóri Oddsson vararíkislögreglustjóra. Í máli þeirra kom skýrt fram að ákvæði gildandi laga um inntökuskilyrði í Lögregluskólann eru býsna ströng. Upp hafa komið tilvik að þurft hefur að vísa mjög hæfum umsækjendum frá vegna strangra skilyrða, t.d. um aldur umsækjenda. Því eru veigamikil rök fyrir að rýmka þessi skilyrði.
Herra forseti. Mig langar aðeins að koma inn á þá umsögn sem Lögregluskóli ríkisins veitti en hún lýsir mjög því sem verið er að hugsa með slíkum breytingum og þá um leið náminu eins og það verður ef þessi lög verða samþykkt á hinu háa Alþingi.
Breytingar á skipulagi náms í skólanum fela einkum í sér breytingar á starfsþjálfun nemendanna. Eins og ég sagði áðan er í dag mikill skortur á menntuðum lögreglumönnum til starfa, þ.e. faglærðum lögreglumönnum. Í lögreglu ríkisins eru því jafnan á hverjum tíma margir tugir ófaglærðra manna sem sinna lögreglustörfum. Markmið lögregluyfirvalda er að í náinni framtíð sinni ekki aðrir lögreglustörfum en þeir sem lokið hafa grunnnámi við Lögregluskóla ríkisins.
Lögregluskóli ríkisins, ríkislögreglustjóri sem og dómsm\-rn. hafa komist að þeirri niðurstöðu að fjölga beri menntuðum lögreglumönnum verulega á næstu árum. Þegar hefur verið ákveðið að á þessu ári verði útskrifaðir allt að 62 lögreglumenn frá skólanum, helmingur í maí og annar helmingur í desember. Stjórnendur Lögregluskólans telja æskilegra að námið verði heildstæðara en að þeirra mati er starfsþjálfunin í dag of löng. Tillögur frv. miða því að að stytta starfsþjálfunina þannig að lögreglunámið taki eitt samfellt ár jafnframt því sem gert er ráð fyrir að eftirlit skólans með nemendum í starfsþjálfun verði meira en nú er. Til að gefa einhverja mynd af þeirri hugsun sem býr að baki, eða hvernig námið verður þegar þessi lög eru komin til framkvæmda, ef Alþingi samþykkir þau, vil ég leyfa mér, herra forseti, að vitna í bréf frá Lögegluskólanum:
,,Í samræmi við þessar hugmyndir er lagt til að almennu lögreglunámi og starfsþjálfun verði skipt í þriggja anna heildstætt nám, sem taki því sem næst 12 mánuði, þannig að fyrri önn í skólanum verði í fjóra mánuði, að jafnaði janúar til og með apríl; þá taki við fjögurra mánaða starfsþjálfun, sem áhersla er lögð á að er hluti námsins, og að því loknu tekur við fjögurra mánaða síðari önn í skólanum fram undir jól. Með slíku samfelldu námi`` --- en m.a. er ætlunin að þetta taki yfir heilt almanaksár --- ,,og þjálfun telja stjórnendur skólans að tök séu á að auka gæði námsins í heild sem ætti að vera flestum þeim sem áhuga hafa fremur spennandi og hagkvæmur kostur, auk þess sem fullyrða má að þetta verði betra nám sem samt sem áður mun kosta samfélagið minna en nú er. Slíkt fyrirkomulag grunnnámsins gerir skólanum kleift að efla enn frekar framhaldsmenntun lögreglumanna sem þrátt fyrir allt hefur verið verulega efld á síðustu árum.``
Herra forseti. Nefndin leggur til að frv. verði samþykkt óbreytt.