Kolbrún Halldórsdóttir (andsvar):
Herra forseti. Mér þykir gott að heyra hjá hv. þm. að hann lítur svo á að landshlutabundin skógrækt eigi að fara í mat á umhverfisáhrifum á þeirri forsendu að slík verkefni séu það stór að ákvæðið í 2. viðauka komi því til leiðar að verkefni af þessari stærðargráðu fari í mat á umhverfisáhrifum. Mér sýnist samt sem áður, herra forseti, að það væri í raun og veru í samræmi við vilja hv. þm. að setja landshlutabundna skógrækt undir 1. viðauka þar sem hún færi undantekningarlaust í mat og væri skilgreind sem slík. Ég sé orðið ekki ástæðuna fyrir því að undanþiggja landshlutabundna skógrækt 1. viðauka.
Mig langaði einnig að fá álit hv. þm. á þessu sem ég nefndi í hinni spurningunni sem ég lagði fyrir hann í fyrra andsvari mínu um það hvort hann liti svo á að Skipulagsstofnun geti hafnað framkvæmd vegna ónógra gagna eða vegna ófullnægjandi rannsókna þegar frummatsskýrsla liggur fyrir.