Steingrímur J. Sigfússon:
Herra forseti. Helstu ástæður þessarar frávísunartillögu af okkar hálfu eru þær að þetta mál er engan veginn nógu vel undirbúið. Á þessu frv. eru mjög alvarlegir ágallar sem lúta m.a. að samkeppnislögum og samhengi þessa máls við þau. Í þriðja lagi erum við algerlega andvíg öllu einkavæðingarbrölti hvað varðar þetta mikilvæga samgöngumannvirki að svo miklu leyti sem slíkt kann að leynast þarna á bak við þessa breytingu rekstrarins í Keflavík yfir í hlutafélag. Við teljum því heppilegast að vísa þessu máli til ríkisstjórnarinnar og láta hana vinna heimavinnuna sína.