Jón Bjarnason (andsvar):
Herra forseti. Ég get alveg fallist á það sem hæstv. ráðherra kom inn á um göng milli Siglufjarðar og Ólafsfjarðar að gert er ráð fyrir því að sú leið sem hann minntist á verði einn fyrsti kostur sem verði skoðaður. Jafnframt eru aðrir kostir ekki útilokaðir því að þessar leiðir eru fjarri því að vera fullkannaðar. Ég legg áherslu á þetta en geri mér fyllilega grein fyrir hvar fyrstu áherslur hafa legið.
Hæstv. ráðherra minntist á veginn um Norðurárdal og á veginn um Bröttubrekku en vegurinn um Norðurárdalinn er bara að hluta til inni á þessari núgildandi áætlun þannig að fjármögnun á þeirri leið liggur ekki fyrir að fullu. Ég lagði áherslu á að þeim framkvæmdum mætti alveg að skaðlausu flýta svo og að taka einbreiðar brýr á þessum vegum. Verkefnin sem má horfa til eru því næg þegar valið er á milli verkefna til að flýta eða finna farveg fyrir aukið fjármagn.