[prenta uppsett í dálka] 3. fundur, 125. lþ.
Ögmundur Jónasson (andsvar):
Herra forseti. Aðeins örstutt athugasemd og leiðrétting. Það er rétt sem kom fram í máli hæstv. fjmrh. að við höfum stundum rætt um einkaframkvæmd í þessum sal og eigum án efa eftir að gera það í framtíðinni og á komandi dögum vegna þess að þingflokkur Vinstri hreyfingarinnar -- græns framboðs, hefur lagt fram þáltill. þar sem tekið er á þeim málum. Hæstv. fjmrh. segir að verið sé að skoða möguleika á einkaframkvæmd í skólakerfinu og í heilbrigðiskerfinu. Ákvarðanir hafi ekki verið teknar að öðru leyti en því að Iðnskólinn í Hafnarfirði verði reistur og rekinn á þeim forsendum. Síðan er verið að kanna hjúkrunarheimili hér á höfuðborgarsvæðinu einnig.
Það sem ég vildi leiðrétta er sú staðhæfing hæstv. fjmrh. að reynslan af þessu fyrirkomulagi í Bretlandi, ,,private finance initiative``, einkaframkvæmd, hafi verið góð. Það er rangt. Hún er slæm og það get ég stutt tölulegum rökum. Ég hlakka til að gera það í umræðu á næstu dögum.
