[prenta uppsett í dálka] 5. fundur, 125. lþ.
Pétur H. Blöndal:
Herra forseti. Hér er dálítil umræða um hlut flokka á Alþingi. Nú er það svo að ég er í 26 manna flokki og líð ævinlega fyrir það. Þannig fengu þessir 26 þingmenn eingöngu þrjá ræðumenn í umræðu um stefnuræðu forsrh. á dögunum á meðan tveggja manna flokkur fékk að tala þrisvar. Það er því ýmislegt sem menn geta sagt skoðanir sínar á á hlutföllum flokkanna á Alþingi.
Varðandi skipun þessarar nefndar þá fellst ég alveg á þau rök sem hæstv. sjútvrh. færði áðan, þ.e. að 38 þingmenn fá þrjá af þeim þingmönnum sem eru skipaðir, af þessum fimm, og það eru akkúrat 13 á bak við hvern og síðan fá 25 tvo, þ.e. 12 á bakvið hvern. Það er svo aftur spurning hvort stjórnarandstaðan hafi ekki samráð sín á milli og upplýsi þá tvo sem eru sér í flokki um það sem kemur fyrir nefndina og hvað hún er að fjalla um. Það er aftur á móti þeirra vandamál.
Það er ekki ágreiningur um fiskveiðistjórnarkerfið. Ég held að það sé enginn sem óski eftir því að taka frekar upp sóknarmark í staðinn fyrir aflamark. Það er heldur ekki ágreiningur eða ekki mjög víðtækur ágreiningur um framsalið. Það er nauðsynlegt að flestra mati. Meginágreiningurinn er um eignarhaldið á veiðiheimildunum. Og það þarf að ná almennri sátt um eignarhaldið. Hvernig túlka á og framkvæma ákvæðið um að fiskstofnarnir í kringum landið séu sameign þjóðarinnar. Nefndinni er ætlað að ná víðtækri sátt meðal þjóðarinnar um þetta og það mun binda nefndarmenn í starfi sínu.
