[prenta uppsett í dálka] 6. fundur, 125. lþ.
Utanríkisráðherra (Halldór Ásgrímsson):
Herra forseti. Ég vil mótmæla þeim ummælum hv. þm. Ögmundar Jónassonar sem ég skil nú ekki hvað gengur til þegar hann segir að ég styðji yfirgangsöflin í Rússlandi eins og hann orðaði það svo smekklega. Ég sagðist hafa miklar áhyggjur af málinu.
Ég hef lýst þeim skoðunum mínum að takmörk séu fyrir því hvað yfirvöld í sjálfstæðu ríki geti gert gagnvart borgurum sínum. Ég var þeirrar skoðunar í sambandi við Kosovo að alþjóðasamfélagið ætti að grípa þar inn í til að koma fólki þar til hjálpar. En það eru alvarleg skref að stíga að blanda sér inn í mál með þeim hætti. Menn gera það ekki umhugsunarlaust. Ég lagði á það áherslu að deilur sem þessar yrðu leystar friðsamlega. Ég endurtek það og vona að hv. þm. sé mér sammála um það. Ég biðst undan að hann tali á þann hátt sem hann gerði sem var algjörlega ástæðulaust.
