[prenta uppsett í dálka] 6. fundur, 125. lþ.
Ísólfur Gylfi Pálmason:
Herra forseti. Ég beini fyrirspurn til hæstv. menntmrh. Ástæða fyrirspurnarinnar var sameiginlegur fundur þingmanna Suðurlands með stjórn Samtaka sunnlenskra sveitarfélaga í síðustu viku þar sem ýmis brennandi mál er snertu Suðurland og reyndar landsbyggðina í heild voru rædd.
Ég spyr hæstv. menntmrh.:
1. Hverjar eru skoðanir og framtíðarsýn hæstv. menntmrh. til fræðslunets sem stofnað hefur verið og starfrækt víða um land, t.d. til Fræðslumiðstöðvar Suðurlands við Fjölbrautaskóla Suðurlands á Selfossi og til Fræðslunets Austurlands, sem stofnað hefur verið við Menntaskólann á Egilsstöðum og víðar?
2. Hvernig sér hæstv. menntmrh. slíkar stofnanir eða deildir tengjast öðrum háskólum í landinu, svo sem Háskóla Íslands, Kennaraháskóla Íslands, Háskólanum á Akureyri, Samvinnuháskólanum á Bifröst, Búnaðarháskólanum á Hvanneyri eða Viðskiptaháskólanum í Reykjavík?
3. Þykir hæstv. menntmrh. ástæða til að efla fræðslunetin og skapa þeim tekjustofna og rekstraröryggi til frambúðar?
