[prenta uppsett í dálka] 8. fundur, 125. lþ.
Árni Steinar Jóhannsson:
Herra forseti. Umræða um málefni sveitarfélaganna hvað varðar félagslegar íbúðir og vandræðin sem eru samfara rekstri þeirra hefur átt sér langan aðdraganda. Bent var á það í hinni pólitísku umræðu á sínum tíma alls staðar úti í þjóðfélaginu að uppsetningin á því kerfi sem var sett í gang væri röng og stórhættuleg gagnvart þeim byggðarlögum þar sem hætta væri á að fólki fækkaði. Það hefur aldeilis komið á daginn að á síðustu árum hefur þetta verið klafi á sveitarsjóðum margra sveitarfélaga. Eftir þeim upplýsingum sem ég hef stendur á því að ríkisvaldið komi myndarlega á móti sveitarfélögunum til þess að leysa vandann.
Ég vil árétta það, hæstv. félmrh., að þetta er mjög brýnt vandamál sem þarf að leysa vegna þess að í mörgum tilfellum eru sveitarsjóðirnir þannig settir að þetta tekur nánast allt það fjármagn sem út af stendur til uppbyggingar á öðrum sviðum í viðkomandi sveitarfélögum. Þetta er einn liður í að leysa úr vanda landsbyggðarinnar og ég vonast til þess að gengið verði rösklega til verks og ríkissjóður Íslands komi myndarlega fram á móti sveitarfélögunum til að leysa vandann.
