[prenta uppsett í dálka] 13. fundur, 125. lþ.
Fyrirspyrjandi (Kolbrún Halldórsdóttir):
Virðulegi forseti. Fyrirspurn mín lýtur að reglugerð frá Stjórnarráði Íslands varðandi ráðuneyti og verksvið ráðuneyta. Hún er svohljóðandi:
,,Hvaða ástæður liggja til þess að mál er varða alþjóðasamskipti og samvinnu á sviði umhverfismála hafa verið tekin frá umhverfisráðuneytinu og færð til utanríkisráðuneytis með 2. gr. auglýsingar nr. 73 28. maí 1999?``
Auglýsingin sem hér er vitnað til varðar eins og kunnugt er verksvið utanrrn. en 8. tölul. reglugerðarinnar fjallar um ráðuneyti og verksvið þeirra og er svohljóðandi, þ.e. 8. tölul. í þeirri verkefnaupptalningu sem heyrði undir umhvrn:
,,Alþjóðasamskipti og samvinna á sviði umhverfismála.``
Virðulegi forseti. Mig fýsir að heyra skýringar á því að þessi auglýsing er birt og sá stóri þáttur að mínu mati á verksviði umhvrn. er færður til á þennan hátt. Ég hefði talið það eðlilegt að umsýsla með alþjóðasamninga á sviði umhverfismála heyrði undir hæstv. umhvrh. og umhvrn., en óska eftir því að hæstv. forsrh. skýri fyrir okkur tilurð og ástæðu þessarar auglýsingar og breytingar.
