[prenta uppsett í dálka] 13. fundur, 125. lþ.
Hjálmar Jónsson:
Herra forseti. Sjónvarpið og allt Ríkisútvarpið er góð og merkileg stofnun og hefur unnið mikilvægt starf í þjóðlífi okkar. Það hefur menningarhlutverk, öryggishlutverk, afþreyingarhlutverk og sinnir því prýðilega að flestu leyti. Auðvitað eru breytingar sem hljóta að verða í tímans rás eftir því sem aðstæður og nýir tímar kalla á og ekkert nema gott um það að segja. Hins vegar gengur allt of hægt að ljúka við dreifikerfið þannig að útsendingar náist alls staðar á byggðu bóli á Íslandi. Og það er einfaldlega til skammar að það skulu vera 78 heimili í landinu sem enn þá nái ekki sjónvarpinu. Allar tækniframfarir, textavarpið, hugsanlega ný sjónvarpsrás og hvað sem er, á að bíða þangað til búið er að ljúka þeim einföldu atriðum að allir landsmenn sitji við sama borð. Þangað til það gerist er Ríkisútvarpið því miður ekki útvarp allra landsmanna.
