Samgönguráðherra (Sturla Böðvarsson):
Herra forseti. Það er alveg ljóst að meiri parturinn af þeirri lækkun sem talað er um á framlögum til vegamála er á höfuðborgarsvæðinu. Á hinn bóginn liggur alveg ljóst fyrir að framlög til hafnargerðar eru að mestu leyti úti á landi. Það þekkja þingmenn. Hins vegar er hægt að segja frá því að ýmsir hv. þm. og einkum og sér í lagi sveitarstjórnarmenn hafa sýnt því mjög mikinn skilning að við þurfum að gæta að okkur þannig að ekki fari neitt úr böndum í efnahagsmálum og þess vegna hafa sveitarstjórnarmenn haft ágætan skilning á því að við þyrftum að hægja á, draga saman seglin og búa okkur undir framkvæmdir þegar þær valda ekki mikilli spennu á vinnumarkaði.