[prenta uppsett í dálka] 29. fundur, 125. lþ.
Jón Kristjánsson (andsvar):
Herra forseti. Mér finnst þessi umræða vera komin dálítið út í móa ef svo má segja. Það er náttúrlega alveg ljóst að þingnefndir hafa ekki tekið einstaklinga til viðtals í stórum stíl. Það vita hv. þm. sem hafa verið á þingi. Hins vegar hefur almenningur í landinu aðgang að þingmönnum og það er til fleiri samskiptamátar en tölvur. Þeir sem hafa ekki tölvu og hafa áhuga á því að koma málum á framfæri geta væntanlega skrifað bréf. Sú leið er enn í fullu gildi. Margs konar samskiptamátar eru til fyrir almenning til að koma sjónarmiðum sínum á framfæri við Alþingi. Það er alveg nýtt (Gripið fram í: Við nefndina.) ef það er alveg útilokað fyrir almenning í landinu að koma sjónarmiðum sínum á framfæri við þingnefndir. Hvenær varð það? Hvenær var múrað á milli þingnefnda og almennings í landinu eða þingmanna og almennings í landinu? Ég kannast ekki við það.
