[prenta uppsett í dálka] 30. fundur, 125. lþ.
Svanfríður Jónasdóttir (andsvar):
Herra forseti. Það má vel vera að ekki finnist önnur leið betri en sjálfsagt er að fara í þann leiðangur að leita og ugglaust má gera hlutina öðruvísi en gert er í dag að einhverju leyti þannig að meiri sátt ríki um.
Ég er alveg sammála hv. þm. um að flokkspólitík þarf ekki alltaf að vera ávísun á spillingu eða eitthvað vont í sjálfu sér, það er langt í frá. Þetta er sú aðferð sem við höfum ákveðið að viðhafa til að ná lýðræðislegri niðurstöðu í málum og er sjálfsögð, eðlileg og jákvæð og hluti af okkar stjórnkerfi.
Ég er hins vegar ekkert viss um að flokkspólitík eigi erindi inn í stjórnir eins og stjórnir Ríkisútvarps, það er það sem ég var að segja. Í því felst ekki áfellisdómur um flokkspólitík, í því felst einungis ósk um að mál geti ráðist á þeim vettvangi án þess að menn séu þar með sína flokkspólitísku pinkla uppi á borði. Ég er kannski að biðja um faglegra útvarp og útvarp þar sem menn og málefni eru hvorki tekin inn sérstaklega eða útilokuð sérstaklega af flokkspólitískum ástæðum.
