Margrét Frímannsdóttir (andsvar):
Virðulegi forseti. Ég spyr nú aðeins um þetta með bréfin á markaðnum vegna þess að það hefur komið fram aðeins í umræðu í fjölmiðlum að undanförnu. Þetta er ekki í fyrsta skipti sem það gerist að skortur er á bréfum á markaði um mánaðamótin nóvember/desember og þá m.a. vegna þess að verið er að undirbúa það að fyrirtæki ætla sér inn á hlutabréfamarkaðinn í aðdraganda þess að sala glæðist oft rétt fyrir áramót. Þau eru að undirbúa það fyrst og fremst. En ég vildi aðeins segja að það getur verið liður í hugsanlegri sameiningu eða samruna banka að fara með hluta af Landsbanka eða Búnaðarbanka í dreifða eignaraðild, það getur verið liður í því að liðka fyrir samruna banka og eins og heyrst hefur að einhverjar viðræður séu í gangi sem kannski eru ekki opinberar enn.