Fyrirspyrjandi (Sigríður Jóhannesdóttir):
Hæstv. forseti. Það fór eins og mig reyndar grunaði að hæstv. umhvrh. hafði a.m.k. ekki á hraðbergi upplýsingar um hver væri ábyrgur fyrir slíku slysi. Ég óttast að það hafi kannski aldrei farið fram alvarleg athugun á því hver yrði ábyrgur í slíku tilfelli.
Ég veit að þessi hætta er víða til staðar. En hún er kannski sérstaklega mikil þarna af jarðfræðilegum ástæðum og líka vegna þess að flutningar, t.d. á eldsneyti, á þessari leið eru miklu meiri en annars staðar a.m.k. þar sem ég þekki til. Og ég vil leggja á það áherslu að ég tel að þessi mál þurfi að skýrast, þ.e. hver er ábyrgur ef slíkt slys yrði, vegna þess að það liggur í augum uppi að það yrði gríðarlegt fjárhagstjón ef slíkt mundi gerast.