Heilbrigðisráðherra (Ingibjörg Pálmadóttir) (andsvar):
Virðulegi forseti. Ég vil þakka hv. þm. fyrir að draga til baka þau stóru orð sem hann hafði uppi áðan. En mig langar aðeins að koma inn á annan hlut og spyrja hv. þm. að öðru. Hann talaði mikið um geðklofa áðan. Ég ætla að vita hvort hv. þm. muni ekkert eftir því sem hann sjálfur sagði í þingsalnum. Sagði hann ekki að hækka þyrfti laun hjúkrunarfræðinga? Sagði hann ekki að hækka þyrfti laun lækna? Sagði hann ekki að við værum í bullandi samkeppni við útlönd og við værum að missa þessa aðila burt úr landinu? Er hann búinn að gleyma því? Ég spyr: Hver er geðklofi í þessu máli?